29 oktyabr 2025-ci il tarixində Bakı Dövlət Universitetinin (BDU) Karyera və Məzunlarla İş Mərkəzinin təşkilatçılığı ilə xalqımızın tarixi Zəfərinin 5 illiyinə həsr olunmuş “Peşəkar gələcəyə doğru körpü” adlı növbəti ixtisaslaşmış Karyera Sərgisi keçirilib.

Sərgidə TEXİO Academy də aktiv şəkildə iştirak edib. Akademiyanın stendinə yüzlərlə tələbə və məzun yaxınlaşaraq təqdim olunan vakansiyalar, təcrübə proqramları və təqaüd imkanları ilə tanış olublar. Ümumilikdə sərgi çərçivəsində 2000-dən artıq iştirakçıya müxtəlif karyera imkanları təklif olunub.

Karyera sərgisi yalnız iş və təcrübə platforması deyil, həm də şəxsi və peşəkar inkişaf üçün interaktiv mühit kimi diqqət çəkib. Tədbir çərçivəsində müxtəlif “workshop”lar, seminarlar və interaktiv təlimlər keçirilib.

Bu sessiyalardan birini TEXİO Academy-nin təlimçisi Nərgiz Əliyeva təqdim edib. O, iştirakçılara “Kiber gigiyena və rəqəmsal təhlükəsizlik” mövzusunda maarifləndirici təlim keçirərək, gəncləri onlayn mühitdə təhlükəsiz davranış qaydaları və kibertəhlükəsizliyin əhəmiyyəti barədə məlumatlandırıb.

Sərgi boyunca TEXİO Academy komandası gənclərin rəqəmsal bacarıqlarını inkişaf etdirmək, onları gələcəyin peşələrinə hazırlamaq və texnologiya sahəsində karyera imkanlarını artırmaq məqsədilə müxtəlif istiqamətlər üzrə məlumatlar təqdim edib.