5–11 dekabr 2025-ci il tarixlərində İslam Əməkdaşlıq Təşkilatı və Azərbaycan Respublikası Mədəniyyət Nazirliyinin tərəfdaşlığı ilə keçiriləcək “İƏT Mədəniyyət Festivalı: Bakı Yaradıcı Həftə 2025” çərçivəsində CulTech-in  (Mədəniyyət sahəsində texnologiya sahəsi) regional inkişafını əhatə edən xüsusi proqram təqdim olunacaq.

“CulTech” mədəniyyət və texnologiyanın kəsişməsində formalaşan innovativ ekosistem modelidir. Proqramın məqsədi regionun yaradıcı gənclərini bir araya gətirərək rəqəmsal həllər, incəsənət və innovasiya vasitəsilə yeni nəsil kreativ məhsulların yaranmasına şərait yaratmaqdır.

8 dekabr tarixində ICESCO ilə birgə keçiriləcək paneldə CulTech-in regional tətbiqi üçün hazırlanan C-HUB konsepsiyası təqdim olunacaq. C-HUB təlim, hakaton, inkubasiya və scale-up mərhələlərini birləşdirən inkişaf ardıcıllığıdır və İƏT regionunda vahid CulTech ekosisteminin qurulmasına xidmət edir. Konsepsiya Yaradıcı Mərkəz və SUP VC tərəfindən birgə hazırlanıb.

Model artıq Azərbaycanda Yaradıcı Mərkəzin rezidentləri üçün uğurla tətbiq edilir. Növbəti mərhələdə isə Özbəkistan, Qazaxıstan, Türkiyə, Malayziya, BƏƏ və Səudiyyə Ərəbistanı kimi ölkələrdə də həyata keçirilməsi planlaşdırılır. Yaxın gələcəkdə bu coğrafiyanın daha da genişləndirilməsi nəzərdə tutulur.

Festival çərçivəsində “Rəqəmsal dövrdə İslam mədəniyyəti” adlı panel də baş tutacaq. Azərbaycan, Türkiyə, Mərakeş, BƏƏ və Seneqaldan olan ekspertlər rəqəmsallaşmanın İslam mədəni irsinin qorunmasına təsirini, mədəniyyətin yeni media formatlarında təqdim olunmasını və beynəlxalq fəaliyyət modellərini müzakirə edəcəklər.

9 dekabr tarixində keçiriləcək “Invest2Create” paneli yaradıcı sənayelərdə investisiya imkanlarına həsr olunacaq. Region ölkələrindən investorlar və mütəxəssislər kreativ layihələrin investisiya potensialı, kapital axınlarının artırılması və startapların qlobal bazarlara çıxış imkanları haqqında fikir mübadiləsi aparacaqlar.

Həftənin ən ilhamverici hissələrindən biri CulTech məzunlarının TED formatında təqdim ediləcək çıxışları olacaq. Gənclər öz inkişaf hekayələrini, qarşılaşdıqları çətinlikləri və əldə etdikləri nəticələri auditoriya ilə bölüşərək yeni nəsillərə motivasiya verəcəklər.

Festival zamanı həmçinin OAC “Organisation of Artistic Collaboration” tərəfindən CulTech startapları və yaradıcı təşəbbüslər nümayiş etdiriləcək. Bu platforma regionlar arasında mədəni və texnoloji əməkdaşlıq üçün yeni imkanlar yaradır.

“CulTech” mədəniyyət, texnologiya və innovasiyanın birləşdiyi, yeni regional kreativ dalğanın formalaşmasına yol açan çağdaş hərəkatdır.