Dairə seçki komissiyalarının IT mütəxəssisləri üçün seminarlara start verildi
Dekabrın 10-dan etibarən, Mərkəzi Seçki Komissiyasında dairə seçki komissiyalarının informasiya texnologiyaları (İT) üzrə mütəxəssisləri üçün seminarlara start verilib.
TED.az xəbər verir ki, tədbir dairə seçki komissiyalarının İT mütəxəssislərini Dövlət Avtomatlaşdırılmış İnformasiya Sistemi və onun yenilənərək daha da təkmilləşdirilən imkanları barədə ətraflı məlumatlandırmaq məqsədi daşıyır. Seminarlar, həmçinin sistemin proqram təminatlarından praktiki istifadə etmək, İT mütəxəssislərini maraqlandıran məsələlərə əyani şəkildə aydınlıq gətirmək üçün nəzərdə tutulub.
Seminarlar zamanı dairə seçki komissiyalarının İT mütəxəssislərinə bələdiyyə seçkiləri günü seçicilərin fəallığı və səsvermənin nəticələrinə dair protokol məlumatlarının birbaşa MSK-ya ötürülməsi üçün hazırlanan xüsusi proqram modullarından test rejimində istifadə etməyə imkan yaradılacaq. Bu da onların praktiki biliklərini, peşəkar vərdişlərini və iş təcrübələrini daha da artıraraq səsvermə günü sistemdən dəqiq və rahat istifadəni təmin edəcək.
Bələdiyyə seçkilərinin yüksək səviyyədə keçirilməsi istiqamətində son maarifləndirmə layihələrindən olan dairə seçki komissiyalarının İT mütəxəssisləri üçün seminarlar dekabrın 11-i başa çatacaq.