"Hadisə ilə bağlı xidməti araşdırma aparılır. Araşdırmanın nəticəsində hava gəmisinin kapitanının hərəkətləri qiymətləndiriləcək və aviaşirkətin qaydaları pozulduğu təqdirdə ekipajla bağlı müvafiq tədbirlər görüləcək".

Bunu TED.az-a Azərbaycan Hava Yollarının mətbuat katibi Paşa Kəsəmənski pilot Tahir Zərbəliyevlə bağlı yayılan görüntülərə açıqlama gətirərkən deyib.

Qeyd edək ki, Bakıdan Moskvaya uçuş edən və AZAL aviaşirkətinə məxsus olan Airbus A320 təyyarəsinin komandiri bir neçə dəfə kabinədən çıxaraq təyyarədə olan tanışı ilə söhbət edib. Bu isə sərnişinlərin qorxu və həyəcanına səbəb olub.

Bəs uçuş zamanı hansı hallarda pilot kabinəni tərk edə bilər?

Adının çəkilməsini istəməyən pilot bildirib ki, təyyarə havaya qalxarkən və eniş zamanı avtopilot rejimindən istifadə edilmir: “Yəni təyyarə havaya qalxdıqdan sonra xüsusi panel, avtopilot düyməsi işə salınır. Eniş vaxtı isə yenidən avtopilot rejimi söndürülür və təyyarəni pilotlar idarə edir. Təyyarə havaya qalxdıqdan sonra pilotun bir neçə halda kabinəni tərk etmə hüququ var. Əgər uçuş vaxtı 6 saatdan azdırsa, pilotlardan biri qısa zaman ərzində kabinəni tərk edə bilər. Bu zaman isə ikinci pilotun yanına "bortprovodnik" keçir”.

“Uçuş 6 saatdan çox çəkdiyində hava gəmisinin ekipajında 3 və ya 4 pilot olur. Bu zaman isə pilotlardan biri sərnişin salonuna gedə, dincələ, hətta yata da bilər.

Eyni zamanda, əgər sərnişin salonunda kiminsə, köməyə ehtiyacı varsa, pilot yardım edə bilər. Lakin hava şəraitində burulğan və s. kimi problemlər olduqda pilot heç bir halda kabinəni tərk edə bilməz”, – deyə o əlavə edib.

Məlum olduğu kimi, Bakı-Moskva reysinin müddəti 3 saatdır. Buna görə də, pilot kabinəni tərk etməklə qaydaları pozub. Pilotun bunu zəruri ehtiyac olmadan etməsi və bir neçə dəfə təkrarlaması, o cümlədən sərnişinlərin iradını nəzərə almaması məsələni daha da qəlizləşdirir.

6o yaşlarında olduğu deyilən pilot Tahir Zərbəliyev əldə etdiyimiz söyləntilərə görə, bundan öncə də qalmaqala səbəb olub. Belə ki, pilotun başqa uçuş zamanı salonda deputatlardan biri ilə mübahisə etdiyi və buna görə ona AZAL tərəfindən şifahi töhmət verildiyi deyilir. 

Məlumata görə, pilotun AZAL-dakı fəaliyyəti ilə bağlı qərar məsələ ilə əlaqədar yanvarın 13-də keçiriləcək Daxili Nizam-İntizam Komisiyasının iclasından sonra məlum olacaq.

TED.az