“Bu il  İKT LAB Tətbiqi və Tədris Mərkəzi üçün prioritet məsələ mütəxəssis hazırlığı olacaq. Ona görə də, layihələrdən daha çox tədrisə yönələcəyik. Əşyaların İnterneti tədrisi üçün iki proqram düşünmüşük – IoT Maker və IoT Applier. Tədris bazasını qaldırmaq üçün proqramı hazırlamışıq, amma tədris materialları, kitabları yoxdur. Bəzi proqramlaşdırma dilləri ilə bağlı material var. Lakin sırf Əşyaların İnternetinin tədrisi üçün Azərbaycan dilində vəsait yoxdur. Bu ilki planımızda əsas hədəflərimizdən biri də qeyri-formal şəkildə IoT üzrə tədris təşkil etməkdir”.

TED.az xəbər verir ki, bunu “IoT LAB Internship 2019” Hesabat tədbirində İKT LAB Tətbiqi və Tədris Mərkəzinin direktoru Rauf Cabbarov deyib.

HƏMÇİNİN OXU: IoT LAB Internship laboratoriyasında 10 layihə icra olunub – AÇIQLAMA

Rauf Cabbarov bildirib ki, İKT LAB Tətbiqi və Tədris Mərkəzi tərəfindən Əşyaların İnterneti üzrə icmanın yaradılması planlaşdırılır: “İcmanı yaratmaqda məqsəd layihələr haqqında daha geniş auditoriyaya çıxış əldə etməkdir. Bu zaman tərəfdaş toplamaq da rahat olacaq. Bu il üçün növbəti planlarımızdan biri də IoT üzrə müsabiqələr təşkil edib mükafat təsis etməkdir”.

Zeynəb ƏKBƏR