“Microsoft şirkəti tərəfindən müasir iş yerlərində istifadəçilər üçün ən son kibertəhlükəsizlik həlləri təklif edilir”.

Bunu TED.az-a açıqlamasında Microsoft şirkətinin Azərbaycandakı rəhbəri Qaçay Mirzəyev bildirib.

Qaçay Mirzəyev tədbirə gələn şirkət rəhbərlərinə diqqət çəkərək bunun sevindirici hal olduğunu deyib: “Əlbəttə, sözügedən tədbir texniki təlim deyil ki, dinləyici konfransdan sahə üzrə professional bilgilər əldə edib getsin.  Müşahidə etdikdə görürəm ki, tədbirə gələnlərin əksəriyyəti şirkət rəhbərləridir. Amma gələnlər kibertəhlükəsizlik sahəsinin mütəxəssisləri olmalıdır. Bu, sevindirici haldır. Bəzən düşünürlər ki, kibertəhlükəsizlik ancaq IT mütəxəssislərinin səlahiyyətində olan məsələdir. Amma bu, belə deyil. Kibertəhlükəsizlik hər kəsin vəzifə öhdəliyi və məsuliyyətidir. Bu məsələni hər kəsə çatdıra bilsək, onda işimiz rahatlaşacaq”.  

“Belə məsələlərdə artıq əməkdaşlıq formalaşır. Tədbirdə yalnız təşkilatlar deyil, kibertəhlükəsizlik həlləri verən şirkətlər, vendorlar var. Keçənilki tədbirdə daha çox trendlər, statistik hesabatlara üstünlük verilirdi. Bunun nəticəsində insanlar məsələnin nə dərəcədə ciddi olduğunu anladılar. Bu il isə tədbirdə daha çox həll yolları ilə bağlı çıxışlar görürük. Microsoft olaraq, NRYTN ilə əməkdaşlıq nəticəsində dövlət qurumlarının lisenziyalaşdırılması, bununla da kibertəhülükələri azaltmaq haqqında, eyni zamanda müasir iş yerinin kibertəhlükəsizlik mövzusunda çıxış edəcəyik. Yəni müasir iş yerində, müasir təhlükələr var. Bunun qarşısını almaq üçün də müasir kibertəhlükəsizlik həlləri lazımdı. Microsoft bu gün həmin həlli verir. Bu, vahid həllin içindədir ki, onun adı “Microsoft 365”dir. “Microsoft 365” həm müasir iş yeridi, həm də daxilində kibertəhlükəsizlik imkanları var”.

Nuranə DAXİLQIZI