Feysbuk şirkəti videokonfrans tətbiqi olan Zoom-a rəqib kimi təqdim etdiyi Messenger Rooms xüsusiyyətinin arealı genişləndirilir. 

TED.az Türkiyə mətbuatına istinadən xəbər verir ki, funksiya artıq Instagram-da da aktivləşdirilib. 

Koronavirus pandemiyasından dolayı evdən işləməyə məcbur olan şəxslərin videokonfrans keçirmələrini təmin etmək məqsədilə hazırlanan Facebook Messenger Rooms ötən həftə ABŞ və Kanadada təqdim olunub. 

Funksiya vasitəsilə 50 istifadəçi eyni anda videosöhbət apara bilir. Bunun üçün Feysbuk hesabına ehtiyac duyulmur. Bundan başqa, Zoom-dan fərqli olaraq vaxt limiti tətbiq olunmur. 

Artıq Instagram üçün də aktiv hala gətirilən xüsusiyyətin qısa müddət sonra bütün dünyada aktivləşdiriləcəyi qeyd edilir. Sözügedən funksiyanın yaxın günlərdə WhatsApp üçün də aktiv hala gələcəyi deyilir. 

Qeyd edək ki, bütün bu avantajlara rəğmən funksiyanın populyar olacağını demək çətindir. Çünki əksəriyyət artıq bu sahədə Zoom-a alışıb.