"Bu gün elektron ticarətin inkişafında aparıcı sahə bank sektorudur. Ölkədə internet bankçılığı kifayət qədər inkişaf etməlidir ki, e-ticarət də inkişaf etsin. Bank hesabının açılması, pul transferləri, investisiya qoyuluşu, ödəmə və kart əməliyyatları internet vasitəsilə komissiyasız həyata keçirilməlidir. Əgər ölkədə hər il bir neçə bank bağlanacaqsa, insanların banklara olan inamı itəcək. O zaman bu şəraitdə necə e-ticarətin inkişafını gözləmək olar ki?"

Bunu TED.az-a açıqlamasında iqtisadçı ekspert Vüsalə Əhmədova deyib.

"Avropada Rusiyadan sonra ən sürətlə artan internet bazarı Türkiyədədir". 

Mütəxəssis qeyd edib ki, ölkəmizdə vətəndaşların onlayn ticarətdən istifadə etməmələrinin bir sıra obyektiv və subyektiv səbəbləri var: "Məsələn, ölkədə internet sürətinin aşağı olması, internetdə satılan malların mağazada olandan baha olması, məhsulun çox gec çatdırılması, məhsulun təhvil verilməsi və ya geri qaytarılması zamanı yaşanan çətinliklər obyektiv səbəblərdirsə, məhsula yaxından baxaraq alma istəyi, internet vasitəsilə alış-veriş etmək üçün kifayət qədər informasiyanın olmaması, güvənsizlikdən dolayı kredit kartı və ya şəxsi məlumatları vermək istəməmə subyektiv səbəblərdir. Bütün bu səbəblərə istər Avropa ölkələrində və istərsə də Türkiyədə nadir hallarda rastlamaq mümkündür. Avropada Rusiyadan sonra ən sürətlə artan internet bazarı Türkiyədədir. Türkiyədə 2020-ci ilin yanvar-iyun ayları üzrə e-ticarət həcmi 91 milyard 700 milyon lira oldu. Bu isə keçən ilin eyni dövrü ilə müqayisədə 64% çoxdur. 135 min kiçik və orta sahibkara e-ticarətə daxil olmaları üçün dəstək verildi. Bu ölkədə istər onlayn supermarketlər, istərsə də digər elektron alış-veriş saytlarında istehlakçılara kifayət qədər endirimlər təqdim edilir. ABŞ kimi inkişaf etmiş ölkədə kiçik və orta sahibkarların 57%-dən çoxu onlayn ticarətlə məşğuldur. Daha bir çox belə nümunələr göstərə bilərik".

Zeynəb ƏKBƏR