Microsoft, Windows istifadəçilərini on ildən bəri narahat edən və ən inadkar problemlərdən biri olan “Yenilə və bağla” xətasını nəhayət aradan qaldırıb. Windows 11-in yeni 25H2 Build 26200.7019 versiyası (və ya 24H2 üçün 26100.7019) ilə birlikdə, artıq istifadəçilər bu seçimi seçdikdə, kompüter gözlənildiyi kimi bağlanır.
 

10 İllik Problem Tarixə Qovuşdu
 

Bu yenilik, Windows 10-un buraxılışından bəri milyonlarla istifadəçiyə təsir edən xroniki bir problemin nəhayət sona çatdığını göstərir. Əvvəlki versiyalarda istifadəçilər “Yenilə və bağla” əmri verdikdə, sistemin bağlanmaq əvəzinə yenidən başladığını və giriş ekranına qayıtdığını müşahidə edirdilər.Təxminən on il davam edən bu xətanın aradan qaldırılması, son önizləmə versiyasının qeydlərində rəsmi şəkildə təsdiqlənib. Microsoft yeniləmə qeydlərində bildirib:
 

“Güncəllə və bağla seçimi ilə sistemin yeniləmədən sonra tam bağlanmamasına səbəb olan əsas problem aradan qaldırıldı.”

Şirkət, xətanın texniki səbəblərinə dair ətraflı açıqlama verməsə də, problemin Windows Servicing Stack komponentindən qaynaqlandığı qeyd olunub.Adi halda “Yenilə və bağla” əməli prosesi sadə görünsə də, əslində iki mərhələdən ibarətdir: sistem əvvəlcə gözləyən yeniləmələri quraşdırır, daha sonra cihazı bağlayır. Lakin Windows bəzi kilidlənmiş sistem fayllarını dəyişmək üçün “offlayn xidmət rejiminə” keçir və bu zaman ekranda “Yeniləmələr yüklənir, kompüterinizi bağlamayın” mesajı görünür.Mütəxəssislər müəyyən ediblər ki, bu kritik mərhələ tamamlandıqdan sonra kompüter bağlanmalı olduğu halda, sistem yenidən işə düşür və giriş ekranına qayıdır.
 

Problemin əsas səbəbi kimi, Servicing Stack-in bağlanma əmri almaması və ya bu əmrin vaxt uyğunsuzluğu səbəbilə itməsi göstərilir. Həmçinin Sürətli Başlatma (Fast Startup) kimi bəzi sistem funksiyalarının da bu xətaya dolayı təsir göstərməsi ehtimal olunur.Son yeniləmə ilə birlikdə, istifadəçilər nəhayət tam bağlanma funksiyasına qovuşublar — və bu, Windows tarixində düzəlməsi ən uzun çəkən xətalardan biri kimi yadda qalacaq.