Hazırda sosial şəbəkələr insanların kütləvi toplaşdıqları yeganə məkan olduğu üçün müxtəlif şirkət və korporasiyalar tanıtımlarını bu istiqamətdə qurmağa çalışırlar.

Maraqlıdır, Azərbaycandakı şirkətlər sosial şəbəkələrdəki marketinq strategiyalarında hansı yanlışlara yol verirlər? Onlar imiclərinə xələl gəlməməsi üçün nələrə diqqət edilməlidirlər?

Mövzu ilə bağlı TED.az-a danışan marketinq mütəxəssisi Əfsun Qurbanov bildirib ki, sosial şəbəkələrin idarə olunmasında peşəkar yanaşma izlənilməlidir: "Bəzən şirkətlər işi kiçik agentliklərə, yaxud müstəqil işləyən fərdlərə həvalə edirlər. Onlar isə qeyri-peşəkar kontent ərsəyə gətirməklə, şirkətin imicinə zərər verə, çox səs-küyə səbəb ola bilirlər. Bu şirkətlərdə mərkəzləşdirilmiş piar kampaniyası, marketinq yanaşması, düzgün idarəetmə təsdiq monitorinq sistemi qurulmayıb. Hansısa kontent ərsəyə gətiriləndə bu kommunikasiya strategiyalarından kənar baş verməməlidir. Onun şirkətin kommunikasiyalara uyğun təsdiqlənmiş vahid kontent strategiyası olmalıdır ki, həmin növ və mesajlara üstünlük versin. Burada təsdiq mexanizmi mütləqdir. Çünki insan faktoru var. Orfoqrafik, qrammatik xətalardan tutmuş, dizayn yanlışına qədər, yaxud hansısa krizə səbəb ola biləcək problemlər çıxa bilər. Buna görə, kontent paylaşılmazdan öncə mütləq ələkdən keçməli, rəhbərlik səviyyəsində təsdiqini tapmalıdır. Yəni filtr sistemi mütləqdir. Çünki sosial media hazırda hamının çıxışı olan ünsiyyət vasitəsidir. Bu tip xətalar çox rahat şəkildə insanlar arasında yayıla bilir. Öncədən özümüzü sığortalamağa çalışmalıyıq. Şirkət mütləq bir böhran kommunikasiya strategiyasına sahib olmalıdır. O, köhnə səhvi aradan qaldırmaq üçün nə cür strategiya quracağını bilməlidir. Bu, müştərilərdən üzr istəmək, düzəliş etmək və s. şəklində ola bilər".

Lamiyə SÜLEYMANLI