“Bakı Telefon Rabitəsi” MMC müştəri məmnuniyyətinin yüksəldilməsini əsas götürərək Çağrı Mərkəzi vasitəsilə aparılan xidmətin keyfiyyətinin daha da artırılması istiqamətində fəaliyyətini davam etdirir.

Rəqəmsal İnkişaf və Nəqliyyat Nazirliyindən TED.az-a bildirilib ki, bu məqsədlə müraciətlərin Avtomat Telefon Stansiyası (ATS), Rabitə Xidmətləri Mərkəzləri (RXM) və filiallardan Çağrı Mərkəzinə yönləndirilməsi geniş şəkildə təşviq edilir. Müştərilərin rahatlığını və məmnunluğunu təmin etmək üçün ənənəvi Çağrı Mərkəzindən başqa baktelecom.az saytı və digər kanallar vasitəsilə də (sosial şəbəkə hesabları və elektron poçt ünvanı) müraciətlərin qəbulu təmin edilib.

Şirkətin 24/7 fəaliyyət göstərən “155” Çağrı Mərkəzi tərəfindən 2023-cü il ərzində 700 minə yaxın zəng emal edilib. Bu, ötən ilin müvafiq dövründə qeydə alınmış göstərici ilə müqayisədə 1,5 faiz çoxdur. Yaranmış tələbata müvafiq olaraq, 2023-cü il ərzində “Baktelecom”da Çağrı Mərkəzinin əməkdaşlarının sayı artırılıb və müraciətlərin operativ həll edilməsi indeksi 97 faizə çatıb.

Eyni zamanda, müştərilərə daha operativ xidmət göstərilməsi məqsədilə 2023-cü ildə aşağıdakı yeniliklər edilib:

- Səhv ödənişlərin təyinatı üzrə korreksiya prosesinin vahid mərkəzdən idarə olunması;

- Alternativ əlaqə kanalının istifadəyə verilməsi (onlayn müraciət);

- Müraciətlərin qeydiyyatı və həlli zamanı abunəçilərə SMS bildirişin göndərilməsi;

- Qoşulmasonrası müştəri məmnuniyyəti indeksinin ölçülməsi;

- Yaranmış borc məlumatlarının çatdırılmasının avtomatlaşdırılması (avtomatik zənglər).

Şirkətin göstərdiyi xidmətin keyfiyyətinin artırılması müştəri məmnuniyyətində də öz əksini tapıb. Belə ki, bu sahədə ixtisaslaşmış araşdırma şirkətinin apardığı sorğunun nəticələrinə əsasən, 2023-cü il ərzində “Baktelecom”un Müştəri Loyallığı İndeksində (Net Promoter Score/NPS) müsbət 9 bal artım qeydə alınıb.

Məlumat üçün bildirək ki, NPS dünya miqyasında bir çox aparıcı şirkətlər tərəfindən müştəri loyallığının ölçülməsi üçün tətbiq edilən bazar araşdırması göstəricisidir.

Qeyd edək ki, Rəqəmsal İnkişaf və Nəqliyyat Nazirliyi tərəfindən həyata keçirilən “Onlayn Azərbaycan” layihəsi çərçivəsində Bakı şəhərinin mövcud ev təsərrüfatı və biznes subyektlərinin 79,3 faizinə GPON texnologiyası ilə yüksəksürətli internetə qoşulma imkanı yaradılıb. Görülən işlərin 2024-cü ilin sonuna kimi yekunlaşacağı planlaşdırılır.

Ölkəmizin genişzolaqlı internetin sürəti ilə bağlı beynəlxalq hesabatlardakı göstəricisi əvvəlki aylarda olduğu kimi müsbət dinamika ilə davam edir. Belə ki, genişzolaqlı və mobil şəbəkə təhlilləri üzrə qlobal şirkət “Ookla” tərəfindən ötən ilin dekabr ayında təqdim edilən hesabatda Azərbaycanda genişzolaqlı internetin sürətinin son 12 ayda artaraq orta hesabla 35,25 Mbit/s-i keçdiyi əksini tapıb. Bu isə ölkədə genişzolaqlı internetin sürətində illik 30 faiz artım deməkdir.