Peyklərdə məlumatların birbaşa bortda emalı nəticələrin daha qısa müddətdə əldə olunmasına imkan verir.

TED.az xəbər verir ki, bunu Rəqəmsal İnkişaf və Nəqliyyat Nazirliyi yanında Kosmik Agentliyin (“Azərkosmos”) nümayəndəsi Aynurə Balakişiyeva Bakıda keçirilən Kosmik Texnologiyalar Konfransında (STC2025) bildirib.

Onun sözlərinə görə, Yer müşahidəsində baş verən ən önəmli dəyişikliklərdən biri yüksək həlli olan peyk qruplarının və çevik sistemlərin meydana çıxmasıdır:

“Bu texnologiyalar real vaxt rejimində praktik nəticələr əldə etməyə şərait yaradır. Digər bir mühüm yenilik isə peyklərdə məlumatların birbaşa emal edilməsidir. Əvvəllər xam məlumatlar yer stansiyalarına ötürülərək orada emal olunurdu və bu, vaxt aparırdı. İndi isə peyk üzərində aparılan emal nəticəsində məlumatların toplanması və nəticənin əldə olunması arasındakı müddət əhəmiyyətli dərəcədə qısalır”.

A.Balakişiyeva əlavə edib ki, bu texnoloji üstünlüklər bulud platformaları və API-lərlə birləşdirildikdə, Yer müşahidəsinin miqyaslana bilən xidmət modelinə çevrilməsi mümkündür:

“Azərkosmos” olaraq bizim məqsədimiz təkcə görüntülər təqdim etmək deyil. Biz eyni zamanda dövlət qurumları və GİS məlumatları ilə işləmək təcrübəsi olmayan istifadəçilərə real vaxtda istifadəyə hazır məlumat çatdırmağa çalışırıq. Bu da Yer müşahidəsində transformativ bir dəyişikliyə səbəb olur”.