AZ

Ölkəmizin niyə dünyaca məşhur tətbiqi yoxdur? - "İlkin investisiyanın hissinə qapılıb işin sonunadək getmirlər"

116334761_636960340559802_3487286871795721646_n
29.07.2020 13:06

Ölkələrin innovasiya ilə rəqabət apardığı dövrdə Azərbaycanda dünyaca tanınan, məşhur tətbiqin olmaması sual doğurur. Layihə yoxdur, yoxsa kifayət qədər tanınmağı bacarmır?

 

Mövzu ilə bağlı TED.az-a danışan Peşəkar startapının təsisçisi Nail Seyidov bildirib ki, startapın qlobal bazara çıxması üçün işə başlayarkən böyük büdcə tələb olunur: "Lokal və qlobal bazara çıxan startapın xərcləri, tələbatları eyni deyil. Fikrimcə, ölkəmizdə hər hansı startap çox böyük məbləğdə investisiya cəlb edə bilmir. Bunun bir neçə səbəbi var. Bəlkə də həqiqətləri düzgün şəkildə ifadə edə bilmirlər, bəlkə də komanda inandırıcı olmur. Buna görə də, qlobal bazarda böyük uğurlar əldə edə bilmirlər. Bununla yanaşı, məncə, bizdə yaranan hər bir startap ilkin mərhələdə ölkədəki boşluğu doldurmağa çalışır. Təbii, dövr fərqi var. Ölkəmizdəki boşluq qlobal bazarda artıq doldurulub. Startaplarımız ilkin olaraq lokal bazarı nəzərdə tuturlar. Yerli bazarda müəyyən səviyyəyə çatıb qlobal arenaya çıxanda isə böyük rəqiblərlə qarşılaşırlar. Böyük rəqiblər bazarı daha yaxşı şəkildə doldururlar. Buna görə də, bizim layihələr çox vaxt məğlub olurlar".

 

 

O, Picsart-ın timsalında ermənilərin dünyaca məşhur tətbiqi olmasını isə bu cür izah edib: "Əslində Picsart dünyada mövcud olan şeyləri etdi, sadəcə fərqli baxış bucağı ilə yanaşdı. Tətbiqə əlavə funksionallıqlar gətirdi. O funsionallıqları viral şəkildə trend edərək dünya gündəminə oturdu və ən çox istifadə olunan tətbiqlər sırasına düşdü. Biz məhz bu mərhələdə çətinliklə üzləşirik".

 

N.Seyidov vurğulayıb ki, ölkəmizin də qlobal bazara çıxan startapları var və müəyyən uğur qazanıblar: "Amma yenə də çox qabarıq şəkildə görünmürlər. Çünki onların çoxu son istifadəçiyə xitab etmir. Məsələn, Picsart bu gün son istifadəçiyə xitab edir. Yəni, mobil telefon işlədən hər kəs onu tanıya bilir. Bizim startaplar isə çox vaxt dar bir müştəri seqmentini əsas götürürlər. Ona görə, uğur qazansalar belə o dərəcədə viral ola bilmir və yaxud geniş kütləyə xitab edə bilmirlər. Azərbaycanda market seqmentini böyüdən startaplar çıxsa və özlərinə ilkin mərhələdə xarici investorlar cəlb edə bilsələr, qlobal bazarda tanına bilən tətbiqlər ola bilər. Sadəcə, başqa bir problem də var. Bizim əhali investisiya alarkən onunla yetinir, kifayət edəcəyini düşünür. Qısaca, bu cür ifadə edə bilərəm: bizim millətin gözü tez doyur, bu isə məğlubiyyətə aparır. İlkin investisiyanın hissinə qapılıb növbəti mərhələdə o dərəcədə aktivləşmir, işin sonuna qədər getmirlər".

 

Lamiyə SÜLEYMANLI

Startaplar bölməsindən digər xəbərlər

Daha çox