“Elektron ticarət layihəsi çərçivəsində yaradılan “Smart Customs” tətbiqi çox rahat və faydalı proqramdır. Beynəlxalq elektron ticarət bazarına yol açan sistem ölkəmizin rəqəmsallaşmasına doğru atılan növbəti addımdır”.

Bunu TED.az-a açıqlamasında İKT üzrə ekspert Asif İbrahimov bildirib.

Ekspertin sözlərinə görə, proqramda insanlar üçün problemə çevirilə biləcək detal da var: “Yeni elektron tətbiqdə qaranlıq qalan bir məsələ mövcuddur, o da ASAN İmza ilə əlaqəlidir. Abunə üçün mütəmadi olaraq ödəniş tələb edən ASAN İmzaya görə ildə bir və ya iki dəfə xaricdən məhsul sifariş verən vətəndaşlar əziyyət çəkəcəklər. Nəticədə proqram əlavə ödəniş tələb edəcək. Məncə, ASAN İmza məsələsi həll olunmalıdır”.

“Əgər dövlətimiz bizi rəqəmsallaşmaya təşviq edirsə, bunun üçün vətəndaşlara xüsusi dəstək verilməlidir. ASAN İmza qismən ödənişsiz olmalıdır. Dövlətin strukturu rəqəmsallaşdıqca, insanların həyatı rahatlaşmalıdır və əlavə ödənişlər yığışdırılmalıdır. Məncə, hər portala şamil oluna biləcək unikal giriş platformasının yaradılması yaxşı olardı. Əlavə xərclər vətəndaşları rəqəmsal dünyadan uzaqlaşdırır”, – deyə ekspert əlavə edib. 

Bəzi ekspertlərsə hesab edir ki, tətbiqdən istifadə üçün ASAN İmza ilə bərabər alternativ, eyni zamanda pulsuz olan giriş imkanları yaradılmalıdır. 

Fatimə ZÜLFİQAR