Yasamal Rayon İcra Hakimiyyətinin və Yasamal Rayon Gənclər və İdman İdarəsinin birgə təşkilatçılığı ilə Prezident İlham Əliyev tərəfindən təsdiq edilmiş “2015-2025-ci illərdə Azərbaycan gənclərinin İnkişaf Strategiyası”na müvafiq olaraq, gənclərin innoativ ideyalarının və yaradıcı təşəbbüslərinin reallaşdırılması, onların praktikada tətbiqi üçün zəmin yaradılması məqsədilə gənclər arasında birinci startap layihələri müsabiqəsi keçirilib.

TED.az xəbər verir ki, Yasamal Rayon Gənclər və İdman İdarəsinin rəisi İlham Səfərov tədbirdə çıxış edərək belə layihələrin gənclərin texniki-yaradıcılıq fəaliyyətinin dəstəklənməsində, habelə istedadlı və yaradıcı gənclərin aşkarlanmasında oynadığı əvəzsiz roldan danışıb. Bildirilib ki, bu ilin mayında ölkəmizdə keçirilmiş “Texnofest Azərbaycan” Aerokosmik və Texnologiya Festivalı gənclərin bu sahəyə olan marağının daha da artmasında, texnologiya və innovasiya sahəsində onların potensialının üzə çıxarılmasında nadir platforma rolunu oynayıb. İ.Səfərov qeyd edib ki, rayon gəncləri də bu yarışmada yaxından iştirak edib, qaliblər sırasında olublar. Birinci startap layihələri müsabiqəsinin rayonumuzda ilk dəfə keçirilməsinə baxmayaraq gənclər bu müsabiqəyə böyük maraq göstərib və innovativ ideyalar irəli sürüb, bu ideyalar müsabiqəni qiymətləndirən ekspertlər tərəfindən böyük maraqla qarşılanıb.

Qeyd olunub ki, bu gün ölkələr müstəqilliklərini qorumaq üçün yüksək texnologiyalara sahib olmalıdırlar. Gənclər bu istiqamətdə özlərini təsdiqləməli, bilik və bacarıqlarını daim artırmalıdırlar. Məhz bu baxımdan bu kimi müsabiqələrin rolu əvəzsizdir.

Sonra müsabiqənin ekspert qrupunun üzvləri Azərbaycan Texniki Universitetinin Radioelektron və aerokosmik sistemlər kafedrasının müdiri Vaqif Məhərrəmov, DOST İnklüziv İnkişaf və Yaradıcılıq Mərkəzinin direktoru Pərvinə İsmayılova və 3 saylı Bakı “Asan Xidmət” mərkəzinin direktoru Tural Nağıyev gənclərin müsabiqəyə təqdim etdikləri layihələrin qiymətləndirilməsini həyata keçiriblər.