"Rəqəmsal transformasiya dünyada baş verən dəyişikliklərə uyğun olaraq insan beyninə təsir göstərir".

TED.az xəbər verir ki, bunu XII Qlobal Bakı Forumu çərçivəsində "Qlobal sağlamlıq böhranla üz-üzə: Hazırlıq və bərabərlikdə yeni sərhədlər" adlı panel müzakirədə Böyük Britaniyanın Lordlar Palatasının üzvü Süzan Qrinfild deyib.

"Rəqəmsal dünyada insan beyni bir növ bünövrə rolunu oynayır. Əgər dünyada baş verənlər müsbət məcrada gedirsə, sizin beyniniz də buna köklənir, lakin neqativ tendensiyalar beynin qavrama və analiz etmə funksiyalarına mənfi təsir edə bilər".

Qrinfild, həmçinin rəqəmsal informasiya axınının insan psixikasına təsiri ilə bağlı narahatlığını dilə gətirib:

"Bəzən biz internet vasitəsilə gənclərin beyninin yuyulmasına dair fikirlər eşidirik. Buna ciddi diqqət yetirməliyik, çünki bu, insanların qavrama və dərketmə qabiliyyətlərində problemlərin yaranmasına səbəb ola bilər".

O, rəqəmsal texnologiyaların inkişafı ilə paralel olaraq beynin sağlamlığına yönəlmiş elmi araşdırmaların və maarifləndirmə tədbirlərinin vacibliyini vurğulayıb.