Avtopilot rejimində işləyə bilən helikopterlər üçün həllər hazırlayan Amerika şirkəti “Skyryse” gələcəkdə hava taksilərinin daha geniş yayılmasına kömək edəcək ən yeni texnologiyasını təqdim edib.

TED.az Rusiya mətbuatına istinadən xəbər verir ki, şirkət bununla bağlı videoçarx yayımlayıb.

Əksər rəqiblərdən fərqli olaraq “Skyryse” sıfırdan elektrikli vasitə yaratmaq üçün səy göstərmək əvəzinə yaratdığı texnologiyaları nümayiş etdirmək üçün bir növ platforma kimi adi helikopterdən istifadə edir.

Şirkət müəyyən modifikasiyalar aparılmış helikopterin insan müdaxiləsi olmadan necə uçduğunu göstərən video yayıb. Pilotlar göyərtədə olsalar da, yalnız “ehtiyat oyunçu” rolunu oynayırlar.

Şirkətdən verilən rəsmi açıqlamada qeyd olunur ki, sözügedən sistemin hər komponenti etibarlılığı və nasazlığa qarşı dözümlülüyü, o cümlədən avtomatlaşdırma funksiyalarının aktivliyini hər zaman təmin edir – üçqat iş prinsipi tətbiq olunur.