"Azərbaycan Milli Elmlər Akademiyasının (AMEA) Yüksək Texnologiyalar Parkının (YT Park) rezidentlərinin dayanıqlığını təmin etmək üçün məqsədyönlü tədbirlər həyata keçirilir". 

TED.az xəbər verir ki, bunu YT Parkın baş direktoru Elton Məmmədov deyib.

O, parkın fəaliyyətində mövcud olan bir sıra texnoloji və hüququ problemləri diqqətə çatdırıb, bu çatışmazlıqların aradan qaldırılmasının qarşıda duran əsas hədəflərdən olduğunu söyləyib.

“YT Park ərazisində fəaliyyət göstərən hər bir rezident üçün lazımi şəraitin yaradılması və onlara dəstək göstərilməsi üçün əlimizdən gələni etməyə hazırıq”, – deyə, bildirən baş direktor elmtutumlu layihələrin istehsalata tətbiqi, onların kommersiyalaşdırılması məqsədilə istehsalçılar və sahibkarların birgə fəaliyyətinin zəruriliyini qeyd edib.

E.Məmmədov AMEA-nın müəssisə və təşkilatları, eləcə də ölkədə fəaliyyət göstərən ali məktəblərin laboratoriyalarında aparılan elmi tədqiqatların kommersiyalaşdırılmasının vacibliyini vurğulayıb, istehsalata yönələn hər bir texnologiyanın ümumilikdə Azərbaycan iqtisadiyyatının dayanıqlı inkişafına xidmət edəcəyini bildirib.

Müvafiq icra hakimiyyəti orqanları və xarici investorlar ilə səmərəli əməkdaşlığın təşkilindən söz açan YT Parkın baş direktoru bu əlaqələrin artıq müsbət nəticələr verdiyini, qarşılıqlı müzakirələr aparılaraq bir sıra mühüm qərarların qəbul olunduğunu diqqətə çatdırıb: "Yerli istehsalçılar tərəfindən yüksəkkeyfiyyətli məhsullar təqdim olunarsa, daxili bazarda Azərbaycan brendinin yaradılmasına nail olarıq. Bu da, ümumilikdə ölkənin həm idxal, həm də ixrac potensialının yüksəlməsinə təkan verər".

Cavid QƏDİR