Pandemiya ali təhsil müəssisələri qarşısında distant təhsildən başqa seçim qoymadığına görə, onlayn məzun gecəsi məsələsi xeyli aktuallaşıb.

Bəs, ali təhsil müəssisələri bu işdə nə dərəcədə maraqlıdırlar? Ölkə universitetləri onlayn məzun günü üçün necə bir proqram nəzərdə tutublar?

Bakı Dövlət Universitetindən TED.az-a bildirilib ki, onlayn məzun günü keçirilməyəcək, bunun əvəzinə məzunlar üçün video təbrik hazırlanacaq: "Videotəbrikdə ölkənin flaqman ali məktəbi olan BDU-nun keçdiyi inkişaf yolu, rektorun təbriki, hər fakültənin universiteti fərqlənmə diplomu ilə bitirən, aktiv tələbələrindən birinin ürək sözləri, arzularına yer verilməsi nəzərdə tutulub".

Azərbaycan Dövlət Neft və Sənaye Universitetindən verilən məlumatda qeyd olunub ki, hələlik, bu məsələ nəzərdən keçirilir. Tələbələrin onlayn məzun günündə iştirak imkanları, bunun nə dərəcədə effektiv olacağı araşdırılır.

Azərbaycan Dövlət Texniki Universitetindən verilən məlumata görə, ali məktəbin televiziya studiyası onlayn məzun günü üçün videoçarx hazırlayır: "Videoçarxda universitetin rektoru Vilayət Vəliyevin təbriki, həmçinin hər fakültə üzrə 2 əlaçı tələbənin fikirləri yer alacaq. İyunun 30-da hər fakültə ayrı-ayrılıqda Zoom proqramı vasitəsilə onlayn görüş təşkil edəcək. Görüşdə videoçarx təqdim olunacaq, eyni zamanda dekanlar və müəllimlər tələbələrlə onlayn görüşüb təbriklərini çatdıracaq. Universiteti fərqlənmə diplomu ilə bitirən məzunlar fəxri fərmanla da təltif olunublar. Fəxri fərmanların məzunlara sərt karantin rejimi bitdikdən sonra göndərilməsi nəzərdə tutulub".

Azərbaycan Dillər Universitetindən də bu məsələnin hələlik müzakirə olunmadığı bildirib. Qeyd edilib ki, bu barədə konkret plan yoxdur.

Bakı Ali Neft Məktəbindən verilən məlumatda isə qeyd olunub ki, burada onlayn formatda “Məzun Günü” tədbirinin təşkili nəzərdə tutulub: "Hazırda bu istiqamətdə hazırlıq prosesi aparılır. Ənənəvi, təmtaraqlı “Məzun Günü” tədbirlərimizdən bir qədər fərqlənsə də, mövcud vəziyyətə uyğun olaraq bu il də məzunlarımızın yola salınmasını xüsusi formada qeyd edəcəyik. Tədbir proqram və kompozisiya baxımından zəngin olacaq. Proqrama Bakı Ali Neft Məktəbinin Rektoru Elmar Qasımovun məzunlarımıza təbriki, əvvəlki illərdə Ali Məktəbimizi bitirən məzunların dünyanın müxtəlif universitetlərindən və transmilli şirkətlərdən builki məzunlara göndərdiyi təbrik videosu, builki məzunların təəssürratları, Ali Məktəb üzrə “İlin tələbəsi”-nin, eləcə də ixtisas birincilərinin elan olunması, musiqi nömrələri və s. daxildir".

Lamiyə SÜLEYMANLI