24 yanvar tarixindən etibarən Bakı-Şuşa və Bakı-Ağdam istiqamətində müntəzəm avtobus marşrutları istifadəyə veriləcək. Bakı-Şuşa-Bakı marşrutunun birtərəfli qiyməti 10.40 manat, Bakı-Ağdam-Bakı marşrutunun birtərəfli qiyməti 9.40 manat təşkil edəcək. Həmçinin yanvarın 24-dən Əhmədbəyli-Şuşa, Füzuli Beynəlxalq Hava Limanı-Şuşa, Bərdə-Ağdam istiqamətində də marşrutlar açılacaq.

Bəs işğaldan azad edilmiş ərazilərə avtobus marşrutlarına bilet alarkən COVID-19 pasportu tələb olunacaq?

Məsələ ilə bağlı Dövlət Avtomobil Nəqliyyatı Xidmətindən TED.az-ın sorğusuna cavab olaraq bildirilib ki, bu səfərlər zamanı COVID-19 pasportu mütləq tələb olunacaq:

"Azərbaycanın digər bölgələrinə rayon və şəhərlərarası marşrut xətlərində olduğu kimi, bu səfərlər zamanı da sərnişinlərdən bilet alarkən COVID-19 pasportu tələb olunacaq", - məlumatda deyilir.

Qeyd edək ki, işğaldan azad edilmiş ərazilərə sərnişin marşrutlarına biletləri “Yolumuz Qarabağa” portalından əldə etmək olar. Vətəndaşlar portala daxil olduqdan sonra "ASAN login" vasitəsilə bilet ala biləcəklər.