Çinli tədqiqatçılar Ayın mikroqravitasiya şəraitini yenidən yaradaraq yerdə uğurlu robot sınaqları aparıblar.

TED.az xarici mediaya istinadla xəbər verir ki, Çin Mədən və Texnologiya Universitetinin mühəndislərindən ibarət qrup göy cisimlərinin səthindən mineralları çıxaracaq robot hazırlayıb.

Çin Mərkəzi Televiziyasının məlumatına görə, dizaynerlər artıq patent almaq üçün müraciət ediblər.

Böcəklərə bənzəyən robot altı ayağa malikdir, onlardan üçünün təkəri, qalanlarının isə pəncəsi var. O, kəskin qarmaqların köməyi ilə öz mövqeyini səthdə düzəldə və qazma əməliyyatlarını həyata keçirə bilər.

Tədqiqatçılar Ayın mikroqravitasiya şəraitini yenidən yaradaraq, Yerin səthində robotu hərəkət etdirməyi uğurla sınaqdan keçiriblər. Qurğu əlavə geoloji kəşfiyyat bacarıqlarına yiyələnməli olacaq.

Universitetin elmi işçisi Li Ruilinin fikrincə, yad planetin mənimsənilməsi prosesində ilk addım resursların çıxarılmasıdır. Onun sözlərinə görə, məhz bu səbəbdən Çin kosmik mədən işlərinə xüsusi diqqət yetirir.

Hazırda Ay resurslarının kəşfiyyatı və inkişafı alimlərin ən böyük diqqətini və daha çox investisiyalar cəlb edir. Telekanal qeyd edir ki, asteroidlərin çıxarılması tədqiqatçıları da maraqlandırır, çünki bu səma cisimlərində nadir torpaq elementlərinin böyük ehtiyatları var.

Pekin Ayın tədqiqi üçün nəzərdə tutulmuş meteoroloji, telekommunikasiya, naviqasiya peykləri və texnologiyalarını təkmilləşdirərək, milli kosmik proqramı fəal şəkildə inkişaf etdirir. Hökumətin dəstəyi ilə çinli mütəxəssislər asteroidlərin və Marsın tədqiqi üzrə layihələr həyata keçirirlər. Orbitdə Çin kosmik stansiyası var ki, o da beynəlxalq əməkdaşlıq üçün nəzərdə tutulub. 2024-cü ildə bu ölkə kosmosa 68 buraxılış həyata keçirib.