“Visa” beynəlxalq ödəniş sistemi müştərilərin fırıldaqçılıq qorxusu olmadan rəqəmsal ödəniş həllərindən inamla istifadə etmələrinə kömək üçün kibertəhlükəsizlik tədbirlərini gücləndirməyə davam edir.

Bunu TED.az-a müsahibəsində “Visa”nın Azərbaycandakı baş direktoru və regional meneceri Nurlan Hacıyev bildirib.

Onun sözlərinə görə, “Visa” banklar və tərəfdaşlarla fəal şəkildə qarşılıqlı əlaqədədir, onlara ödəniş məlumatlarını qorumaq üçün qabaqcıl həllərin tətbiqində kömək edir.

“Artıq bir sıra Azərbaycan banklarında uğurla tətbiq edilən, miqyasının genişləndirilməsinə hazır olan mühüm həllər arasında bir daha risklərin qiymətləndirilməsi və tranzaksiyaların dəyərləndirilməsi alətləri olan “Visa Advanced Authorization” və “Visa Risk Manager”i, xüsusən də onlayn əməliyyatlarda təkmilləşdirilmiş ödəniş autentifikasiyası üçün həlli olan “Visa Deep Authorization”ı, bütün ödəniş prosesini əhatə edən və saxta əməliyyatlar baş verməzdən əvvəl onların qarşısını alan hərtərəfli platforma olan “Visa Protect”i qeyd edə bilərik. Ən effektiv qorunma mexanizmlərindən biri tokenizasiya olaraq qalır – o, nəinki ödəniş prosesini asanlaşdırır, həm də kart məlumatının oğurlanması riskini əhəmiyyətli dərəcədə azaldır. “Visa Token Service” sayəsində ödəniş rekvizitləri konkret əməliyyatdan kənar istifadə edilə bilməyən rəqəmsal tokenlə əvəz olunur”, - N.Hacıyev vurğulayıb.

O hesab edir ki, elektron ticarət ödənişlərinin təhlükəsizliyini təmin etmək üçün şirkət müştərilərə biometrik və ya digər autentifikasiya üsullarından istifadə edərək, PIN-kod və ya kart CVV-si daxil etmədən alış-veriş etməyə imkan verən “Visa Click to Pay” həllini inkişaf etdirir: “Bu, onlayn ödənişləri fiziki pərakəndə satış məntəqələrindəki əməliyyatlar qədər təhlükəsiz edir”.

Bunlarla yanaşı, onun sözlərinə görə, şirkət mütəmadi olaraq kibertəhlükəsizlik və fırıldaqçılığın qarşısının alınması vasitələrinin ən son tendensiyalarının müzakirə edildiyi öyrədici sessiyalar və risk forumları keçirir.

“Onlardan biri hesabdan hesaba ödənişlərin qorunmasıdır. Sistem süni intellektdən istifadə edərək ödənişin kartla və yaxud bank yolu ilə həyata keçirilməsindən asılı olmayaraq hər bir əməliyyat üçün risk ehtimalını qiymətləndirir. Bu, maliyyə institutlarına şübhəli əməliyyatlar baş verməzdən əvvəl bloklamaqla fırıldaqçılığın qarşısını almağa imkan verir”, - baş direktor qeyd edib.

N.Hacıyev vurğulayıb ki, digər mühüm həll “Visa Deep Authorization”dır: “O, kartdan fiziki istifadə etmədən, məsələn, onlayn alış-veriş edərkən və yaxud satış nöqtəsində smartfonla ödəniş edərkən şübhəli ödənişləri müəyyən etməyə kömək edir. Həmçinin ötən il “Visa Risk Manager” və “Visa Advanced Authorization”ın imkanlarını genişləndirdik. Bu alətlər indi istifadə olunan platformadan asılı olmayaraq, hərtərəfli mühafizəni təmin edən bütün növ kart ödənişlərini əhatə edir”.

Baş direktor elektron ticarəti saxtakarlıqdan qorumaq üçün ən yaxşı həll yollarından biri olan “Cybersource”u ayrıca qeyd edib: “Süni intellektlə işləyən bu sistem geniş məlumat spektrini təhlil edir, real vaxt rejimində öyrənir və saxtakarlığın qarşısının alınması üsullarını daim təkmilləşdirir. O, nə qədər çox məlumatı emal edirsə, qorunma, yəni saxtakarlığın qarşısının alınması üsulu bir o qədər effektiv olur”.

Beləliklə, onun sözlərinə görə, 2024-cü ildə “Visa Protect” çərçivəsində ödənişlərin təhlükəsizliyini artırmaq və fırıldaqçılıqla mübarizə aparmaq üçün üç innovativ texnologiya işə salınıb. Bununla yanaşı, N.Hacıyevin fikrincə, süni intellekt fırıldaqçılıq əməliyyatların qarşısının alınmasında əsas rol oynayır: “Təkcə 2023-cü ildə “Visa”nın süni intellekt sistemləri 40 milyard ABŞ dollarlıq saxta əməliyyatların qarşısını ala bilib”.

Müsahibənin tam mətni ilə buradan tanış olmaq mümkündür.