İlk dəfə 1999-cu ildə Pekinə uçuş həyata keçirməklə Çin bazarına daxil olan “Türk Hava Yolları” ölkənin daha bir şəhərini – Sianı öz uçuş şəbəkəsinə əlavə edib.

Aviaşirkətdən TED.az-a verilən məlumata görə, Pekin, Şanxay və Quançjouya uçuşlar təşkil edən “Türk Hava Yolları” Çin bazarındakı 20-ci fəaliyyət ilində Sian reysini açmaqla “Asiya nəhəngi”ndəki uçuş məntəqələrinin sayını dördə çatdırıb.

Sianın uçuş xəritəsinə əlavə edilməsi qərarı 5 noyabr tarixində “Türk Hava Yolları”nın İdarə Heyətinin və İcraiyyə Komitəsinin sədri İlkər Ayçı və Şanxi Əyaləti Kommunist Partiyası Komitəsinin Katibi Hu Hepinq arasında reallaşan görüşdən sonra verilib.

Bu ilin sonunda başlayacaq Sian uçuşları ilkin olaraq həftədə üç dəfə təşkil ediləcək. Lakin 2020-ci ilin yay cədvəlinə keçidlə birgə uçuşların sayı tədricən artırılacaq.

Sian reysinin işə düşməsi ilə “Türk Hava Yolları” və Çin arasındakı qarşılıqlı uçuşların sayı həftədə 24-ə çatacaq.

“Biz Sian istiqamətində uçuşların iki ölkə arasındakı turizm, ticarət, mədəniyyət və iqtisadi əlaqələrə töhfə verəcəyini gözləyirik. Mən inanıram ki, bizim tərəfimizdən yaradılan bu nəqliyyat körpüsü münasibətləri dərin tarixi köklərə əsaslanan hər iki cəmiyyət üçün müsbət nəticələr əldə etməyimizi sürətləndirəcək”, - deyə İ.Ayçı bildirib.