Dekabrın 1-dən Çində tətbiq olunan yeni qanuna əsasən, bütün vətəndaşların internetə çıxışı üçün şəxsiyyət vəsiqəsinin təqdim olunması və sifətin skan edilməsi vasitəsilə əlavə identifikasiya lazım olacaq.

TED.az-ın BBC-yə istinadən xəbərinə görə, təşəbbüs onlayn fırıldaqçılıq hallarına qarşı mübarizə məqsədi daşıyır. Lakin o, eyni zamanda şəbəkə anonimliyi səviyyəsini aşağı endirir. Şəbəkə anonimliyinin azaldılması istifadəçilərin təhlükəsizliyi üçün həyata keçirilir.

Qanun layihəsi bu ilin sentyabr ayında, Honkonq ərazisində ekstradisiya haqqında qanuna qarşı etirazların artıq 6 aydır ki, davam etdiyi zamanda təklif olunub. Belə ki, etiraz hərəkatının iştirakçıları fəaliyyətin koordinasiyası üçün internet xidmətlərindən istifadə edirdilər.

Ölkənin küçələrində quraşdırılan nəzarət sistemlərində sifətin tanınması texnologiyasından geniş istifadə olunur. Çin bu kimi texnologiyaların tətbiqi üzrə dünya lideri olub. 2017-ci ildə Çin Xalq Respublikasında artıq 170 milyon kamera işləyirdi, 2020-ci ildə isə bu göstərici 400 milyonadək yüksələcək. Artıq çinlilər gündəlik həyatda (məsələn, hava limanında naviqasiya və ya supermarketdə məhsulların ödənişi üçün) sifətin tanınması texnologiyasından aktiv istifadə edirlər.

Bir çox ölkələrdə mobil internetə giriş üçün istifadəçiyə SIM-kartların rəsmiləşdirilməsi zamanı şəxsiyyəti təsdiq edən rəsmi sənəd lazım olur. Çin bu proseduru istifadəçi məlumatlarının uyğunluğunu yoxlamaq üçün sifətin skan edilməsi ilə tamamlayır. Beləliklə, səlahiyyətli şəxslər istənilən istifadəçinin identifikasiyası mexanizminə sahib olacaqlar. Belə ki, çinlilərin əksəriyyəti şəbəkədən öz smartfonları vasitəsilə istifadə edir.