Gündəlik həyatımızda kameraların böyük rolu var. Onunla biz evimizi, ofisimizi izləyə bilirik, amma eyni zamanda təhlükəsizliklə bağlı narahat da oluruq. Kameraların təhlükəsizliyi üçün bir sıra məqamlar var ki, bunlara mütləq diqqət yetirməliyik.

TED.az  xəbər verir ki, bu barədə Elektron Təhlükəsizlik Xidməti məlumat yayıb.

İlk növbədə kamera seçimi edərkən təhlükəsizlik baxımından yaxşı reputasiyaya malik kamera seçməliyik. Güclü şifrləmə, ikimərhələli təsdiqləmə və proqram təminatını müntəzəm olaraq yeniləmək imkanına malik kameralardan istifadə daha məqsədəuyğundur.

Kameraları quraşdırarkən onun proqram təminatında standart etimadnamələri dəyişdirməliyik. Etimadnamə dedikdə cari istifadəçi adı və şifr nəzərdə tutulur. Bununla yanaşı, kameranız üçün mürəkkəb, unikal şifrlərdən istifadə edin.

“Wi-Fi” şəbəkənizin təhlükəsizliyindən əmin olun. Müasir kameralar “Wi-Fi” ilə idarə olunduğuna görə şəbəkə təhlükəsizliyi üçün mürəkkəb şifr istifadə olunmalı və şifrləmə (“WPA2” və ya “WPA3”) aktivləşdirilməlidir. Kameranızın təhlükəsizliyi üçün şəxsi cihazlarınızda istifadə etdiyiniz şəbəkədən (Wi-Fi) fərqli şəbəkə istifadə etmək daha yaxşı seçim ola bilər.