Çinin bir neçə aparıcı universiteti ‘‘milli strateji ehtiyaclar” adlandırılan sahələrdə, xüsusən də süni intellekt (AI) sahəsində imkanları genişləndirmək məqsədilə bakalavr proqramlarına qəbulun artırılması planlarını açıqlayıb.

TED.az xəbər verir ki, bu açıqlamalar fevral ayında Çin universitetlərinin böyük marağa səbəb olan “DeepSeek” startapı əsasında süni intellekt kurslarına başladıqdan sonra verilib.

ABŞ-dakı ən qabaqcıl modellərlə müqayisə edilən, lakin xeyli ucuz olan süni intellekt modellərinin yaradılması Çinin “Peyk anı” adlandırılıb.

Analitiklərin fikrincə, Çinin elit universitetlərindən tədqiqatçıların çalışdığı “DeepSeek” startapının uğuru Pekinin STEM sahəsində geniş istedad bazası yaradan

investisiyaları, həmçinin ABŞ-ın çinli tələbələrə viza məhdudiyyətlərini qoyması nəticəsində gənclərin milli texnologiyaya daha çox həvəs göstərməsi ilə bağlıdır.

Pekin Universiteti, Renmin Universiteti və Şanxay Tsyaotun Universiteti 2025-ci ildə süni intellekt, milli strateji əhəmiyyət kəsb edən istiqamətlər üzrə fundamental fənlər və yeni qabaqcıl sahələrdə imkanları genişləndirmək, həmçinin istedadlıları müəyyən etmək üçün hər biri 150 bakalavr yeri əlavə edəcəklərini bildirir.

Yanvar ayında Çin 2035-ci ilə qədər güclü təhsil dövləti qurmaq üçün ilk milli fəaliyyət planını açıqlayıb və bu sənəd təhsilin inkişafının əlaqələndirilməsinə, innovasiyaların gücləndirilməsinə, qüdrətli ölkənin qurulmasına kömək etmək məqsədi daşıyır.

Dekabr ayında təhsil orqanları şagirdlərin yaradıcılığını, elmi maraqlarını və rəqəmsal bacarıqlarını inkişaf etdirmək üçün ibtidai və orta məktəblərdə süni intellekt təlimini tətbiq edəcəklərini bildiriblər.