Azərbaycan Turizm və Menecment Universiteti (ATMU), İqtisad Universiteti və Böyük Britaniyanın Qrinviç Universiteti “British Council” tərəfindən maliyyələşdirilən “Creative Spark” proqramı çərçivəsində tələbələr üçün “Startup Bootcamp” onlayn düşərgəsi təşkil edib.

Bu barədə TED.az-a ATMU-dan məlumat verilib. Bildirilib ki, düşərgədə ATMU-nun tələbələri Qrinviç Universitetinin koordinasiyası ilə biznes-planın tərtib olunması haqqında məlumat əldə edərək öz fikirlərini bunun əsasında tətbiq etmək, müxtəlif sahələrdən olan mentor qrupundan mütəxəssis məsləhətləri almaq, təqdimat bacarıqlarını sərgiləmək imkanı qazanıblar. İdeyalarının həyata keçməsinə kömək edəcək potensial maliyyə mənbələri haqqında məlumat əldə ediblər.

Moderatorlar İngiltərənin “JDM Social LTD” şirkətinin həmtəsisçisi və direktoru, sosial media məsləhətçisi və təlimçisi Jamal Hadjkura, “DVIZU” şirkətinin təsisçisi və brend üzrə konsultantı Daniel Najafi, ATMU tərəfindən müəyyən olunmuş mentorlar “City Centre Rotana Doha” hotelinin gəlir və rezervasiyalar üzrə direktoru, “Hospitality Insights” onlayn qonaqpərvərlik akademiyasının həmtəsisçisi, turizm və qonaqpərvərlik, gəlirlərin idarəedilməsi sahələri üzə təlimçisi Ceyhun Nəsibbəyli, universitetin Karyera və kommunikasiya şöbəsinin mütəxəssisi, “Experience Talks” və “HR Talks” layihələrinin təsisçisi və koordinatoru, Ümumdünya Turist Bələdçiləri Assosiasiyası tərəfindən sertifikatlaşdırılmış beynəlxalq turist bələdçisi və milli turizm bələdçilərinin təlimçisi Aidə Bayramova və ATMU-nun Beynəlxalq əlaqələr şöbəsinin mütəxəssisi və “Beeco” ətraf mühit təşəbbüsünün qurucusu və meneceri İncə Əliyeva olub.