Azərbaycanda mühasibat uçotunun elektron formada aparılması ilə bağlı hüquqi tənzimləmələrin genişləndirilməsi nəzərdə tutulur.

TED.az xəbər verir ki, bu məsələ Milli Məclisin fevralın 14-də keçirilən iclasının gündəliyinə daxil edilmiş “Mühasibat uçotu haqqında” Qanuna təklif edilən dəyişikliklərdə əksini tapıb.

2023-cü il dekabrın 22-də qəbul olunmuş “Mühasibat uçotu haqqında” Qanunda edilən dəyişikliklərə əsasən yeni normativ tələblər müəyyənləşib. Qanuna əsasən, mühasibat uçotunu elektron formada aparmalı olan subyektlərin dairəsi genişləndirilib. Bu subyektlərə dövriyyəsi yüksək olan iri və orta sahibkarlıq subyektləri, ümumdövlət və ictimai əhəmiyyət daşıyan fəaliyyətlə məşğul olan publik hüquqi şəxslər, eləcə də fəaliyyəti xüsusi qanunlarla tənzimlənən vergi ödəyiciləri daxildir.

Təklif olunan qanun layihəsinə uyğun olaraq, büdcə təşkilatlarında da mühasibat uçotunun elektron formada aparılması nəzərdə tutulur, həmçinin “e-mühasibat” informasiya sisteminin tətbiqi təklif olunur. Qanun layihəsi “e-mühasibat” informasiya sisteminin məqsədlərini müəyyən edir. Bu sistem mühasibat uçotunu elektron formada aparan subyektlərə maliyyə hesabatlarını elektron qaydada təqdim etməyə, mühasibat uçotu ilə bağlı beynəlxalq standartların Azərbaycan dilində rəsmi mətnlərinə və hüquqi aktların elektron versiyalarına çıxış əldə etməyə imkan yaradacaq. Bundan əlavə, sistem maarifləndirici məlumatlar və mühasibat uçotunun aparılmasını təmin edən proqram təminatlarına da çıxışı təmin edəcək.

Qanun layihəsinin tətbiqi mühasibat uçotu məlumatlarının operativliyini artırmaq, şəffaflığı təmin etmək, nəzarət mexanizmlərini optimallaşdırmaq və resurs istifadəsini daha səmərəli təşkil etmək məqsədi daşıyır. Xüsusilə, büdcə təşkilatlarının uçot məlumatlarının müvafiq qurumlara daha operativ şəkildə təqdim edilməsi və idarə olunması üçün yeni imkanlar yaradılması planlaşdırılır.

Müzakirələrdən sonra qanun layihəsi birinci oxunuşda təsdiqlənib.