Əmək və Əhalinin Sosial Müdafiəsi Nazirliyinin tabeliyindəki DOST Rəqəmsal İnnovasiyalar Mərkəzi (DOST RİM) ABŞ-da keçirilən “19-cu illik beynəlxalq 2024 Globee® texnologiya müsabiqəsi”ndə uğur qazanıb.

Nazirliyin İctimaiyyətlə əlaqələr şöbəsindən TED.az-a verilən məlumata görə, Mərkəzin 2023-cü il ərzində olan fəaliyyəti və qazandığı uğurlar barədə təqdim etdiyi iş müsabiqənin münsiflər heyəti tərəfindən yüksək qiymətləndirilib.

DOST RİM sosial sahənin uğurla rəqəmsallaşdırılması ilə əlaqədar “Gümüş Globee® Qalibi” mükafatına layiq görülüb.

Müsabiqəyə Azərbaycanla yanaşı, ABŞ, Avstraliya, Vyetnam, Bolqarıstan, Hindistan, Almaniya, Birləşmiş Ərəb Əmirlikləri, İsrail, İsveç, Rusiya, Böyük Britaniya və bir sıra digər ölkələrin 1700-dən çox layihəsi təqdim olunub.

Mərkəzin adı beynəlxalq müsabiqənin rəsmi səhifəsindəki qaliblərin siyahısında yer alıb.

Bununla da bu ilin ötən dövrü ərzində DOST RİM-in əldə etdiyi beynəlxalq mükafatların sayı 13-ə çatıb.