Federal Təhqiqatlar Bürosunun direktoru Kristofer Rey keçmiş prezident Donald Trampa sui-qəsd cəhdi edənin internetdə nələr axtardığını  açıqlayıb. O, sui-qəsdçinin Kennedinin qətli ilə bağlı təfərrüatları araşdırdığını bildirib.

20 yaşlı sui-qəsdçi Tomas Metyu Kruksun sui-qəsddən bir həftə əvvəl internetdə “Necə Osvald Kennedini çox uzaqdan vurdu?" - belə bir axtarış edib. Bu məlumat onun psixi vəziyyətini anlamaq üçün mühüm ipucu hesab olunur. 

Sui-qəsdçi drondan da istifadə edib

New York Times-ın məlumatına görə, sui-qəsdçi iyulun 13-də səhər Batlerdəki mitinq sahəsinə iki dəfə baş çəkib. İkinci səfəri zamanı onun DJI markalı dronla təxminən 11 dəqiqə ərzində mitinq sahəsinin ətrafında müşahidə apardığı məlum olub. 

FTB keçən həftə sui-qəsdçinin telefonunu sındırmağı bacarıb, lakin hələlik heç bir aydın motiv müəyyən edilməyib. FTB həmçinin onun davranışını ətraflı şəkildə araşdırır.